Fassnacht Adee!
(Bitte singen nach der Melodie «Ir Ysebahn» von Mani Matter)
Ä Schnitzelbank z’Altdorf gaat mäischt eppä soo
Dass jeedä wo züäloost si ring cha verstoo
(kleine Sprachreminiszenz an Basel)
Und diä wo das nit chènnt diä gènnt sowisoo
Nit anä
Bestimmt lüägt mä drüf dass käinä wirt ‘tupft
Käis Manndli, käis Wybli ja niämer wirt g’rupft
Bìhèrdä wärdet ä so nit verschnupft
Ä käinä
Ich fräi mi ja eerlich wenn’s Schnitzäli git
So chnuschprig paniärt sint diä doch dr Hit
Und hent Tradition sit eewiger Zit
Mä liäbt si
Vo friäner retsch gärä wenn älter dü wirsch
Und immer nu mäinisch dü sigisch dr Hirsch
wenns Chribblä im Fiddlä wiä äischter nu gschpirsch
Isch Fasnacht
D’Bäizä sint voll gsi und z’Gält gärn üfggriärt
Mä het änant gnegglet het voll intrigiärt
Und hiändä sogar äs blaaws Äüg risgiärt
Diä Frächschtä
Als Guschi, als Häx, als Gloon oder Tiär
Hesch petschget, graggeelet und gsuffä dyys Piär
Am Äscherlimittwuch isch mängä de stiär
Wer hätt’s dänkt
S’git äbä scho mängs wo hit nu isch glyych
S’git dèrtig und ander s’git arm und s’git ryych
Fir vili isch d’Fasnacht wiä Covid ä Syych’
Ja de halt
So scheen gsi isch ds Wätter und d’Stimmig derzuä
Dass ich fescht hoffä s’gäbi jetz nit grat de Rüä
D’Lyt mitenant schnurret käi Tirä blyyb züä
Im Rescht-Jaar!
Nachfasnächtliches Värslibrünzlä am Roten Tisch vom
Freitag, 03. März 2023
ab 18 Uhr im Fomaz
Herzlinks Vic